MA63: Bayar interim RM1.5 bilion ukai reti peminta teputar apus – Hasidah

KUCHING, 16 Okt : Penambah meri bayar khas interim ngagai sepenyampau RM1.5 bilion ukai reti peminta udah teputar apus, ku Sapit Menteri ba Opis Premier Sarawak (Undang-Undang, MA63 enggau Kaul Sarawak-Perintah Besai) Datuk Sharifah Hasidah Sayeed Aman Ghazali.

Iya madah, Perintah Sarawak kebendar deka terus nuntut ngambika siti formula khas ke nyemetak sereta konsisten, ditumbuh dibaruh Perkara 112D Kunstitusyen Perintah Besai.

“Ungkup atur timpuh panjai, perintah Sarawak udah mantaika perambu ngambika siti formula ke nyemetak sereta konsisten ditumbuh, dikena nentuka ikas pemeri khas.

“Perambu formula nya agi dikerandau antara perintah Sarawak enggau Perintah Besai lalu naka tu, bedau bisi formula apus ti disetuju,” ku iya maya sesi tanya saut ba Aum Kunsil Nengeri (DUN) Sarawak, ditu sehari tu.

Kena 16 Sept, Menteri Besai Datuk Seri Anwar Ibrahim madahka penambah bayar interim ari RM600 juta ngagai RM1.5 bilion ungkup Sarawak.

Sharifah Hasidah madah munyi nya maya nyaut tanya Royston Valentine (GPS-Tellian), bekaul status pemadu baru pekara ke dituntut ba Sempekat Malaysia 1963 (MA63), bekau ari pengawa meri bayar khas interim.

Nyaut tanya tambah Royston pasal penemu Sarawak nyema bisi ubah ba renggat Perintah Besai, Sharifah Hasidah madah perintah nengeri deka terus negika hak-hak nengeri baka ke udah ditanggam dalam MA63, enda ngira sapa ti deka ngiring perintah besai.