Bajet Sarawak 2027: RM1.1 bilion negapka pemansang enggau operasyen KUTS

KUCHING, 12 Okt : Perintah Sarawak ngungkupka lebih RM1.1 bilion dikena neruska pemansang Sistem Pengangkut Mengeri Kuching (KUTS) sereta nyukung operasyen nya taun baru.

Ari penyampau nya, RM988 juta disediaka dikena neruska pemansang projek bekaul, ditangkan RM124 juta diagih ngagai Sarawak Metro dikena nyukung operasyen, nyengkaum renggat pemungkal enggau penyikap sebedau servis komersial berengkah.

Premier Sarawak, Datuk Patinggi Tan Sri Abang Johari Tun Openg madahka agih belanja nya maya mantaika Bajet Sarawak 2027 nyerumba Aum Kunsil Nengeri (DUN) Sarawak, sehari tu.

Pengawa bejalaika KUTS mega nyadi sebagi ari pengawa Sarawak dikena negapka sistem pengangkut mengeri nyadi lebih meruan nengah guna teknologi kuasa beresi.

Nitihka terang iya, operasyen pemungkal Transit Arus Autonomi (ART) bekuasa hidrogen ditaga bejalai 2026, sebedau sistem nya dikerembai penuh bepun 2027.

Arung pemungkal ART deka besambungka Depoh Rembus di Samarahan enggau Northbank di Stutong, lalu nengah sukung servis bas pengantara bekuasa hidrogen.

Projek nya mega disukung nengah pemansang loji pemansut hidrogen di Depoh Rembus dikena nyukung pengawa nguna kuasa beresi dalam sistem pengangkut mensia mayuh Sarawak.