Bajet Sarawak 2027: RM130 juta ungkup infrastruktur broadcasting enggau media digital

KUCHING, 12 Okt : Sarawak ngungkupka sepenyampau RM130 juta dikena negapka pemansang industri media, nyengkaum nyendiaka perengkaguna broadcasting antarabansa enggau ngemujurka inisiatif rentayan media digital.

Ari penyampau nya, RM70 juta diagih ba taun baru dikena nembuka perengkaguna opis enggau studio Sarawak Media Group (SMG), ti bejalaika TVS, nyadi palan broadcasting antarabansa.

Premier Sarawak, Datuk Patinggi Tan Sri Abang Johari Tun Openg madah, penambah RM60 juta mega disediaka ungkup Inisiatif Rentayan Media Sarawak di baruh langgur ekonomi digital nengeri.

Iya mansutka pekara nya maya mantaika Bajet Sarawak 2027 nyeruma Aum Kunsil Nengeri (DUN) Sarawak, sehari tu.

Ngelansa pekara bukai, perintah negeri mega ngungkupka RM500,000 dikena ngepunka Fasa Satu pemansang Galeri Seni Sarawak dikena ngenapka pemekuh seni visual lokal.

Dikena nyeraris pemansang industri kreatif, Kaunsil Ekonomi Kreatif Sarawak deka ditumbuh nyadi ejensi besai mungkur sektor pesaka budaya, media, pemerindang digital enggau e-lumba.

Inisiatif tu deka nguna manah mekanisme belanja nyadi penyungkak sereta sukung fiskal dikena nengapka pedagang lokal, penengkebang konten enggau pemekuh seni, sereta ngerembaika penau industri kreatif Sarawak.