Bajet Sarawak 2027: RM200 juta ungkup FTES, ditaga meri pemaik ngagai 10,600 iku nembiak

KUCHING, 12 Okt : Urung 10,600 nembiak ditaga deka bulih pemaik ari Skim Pelajar Tinggi Pechuma (FTES) Sarawak taun 2027, nengah agih belanja RM200 juta disediaka perintah nengeri.

Premier Sarawak, Datuk Patinggi Tan Sri Abang Johari Tun Openg madah, skim nya nyendiaka pelajar pechuma ungkup 64 program bachelor degree ba empat universiti diempu Sarawak.

Inisiatif nya betuju ngerembaika akses ngagai pelajar tinggi bepelasarka merit enggau pengulih nembiak, nadai kebuah enda ulih nampung pelajar ketegal penanggul belanja ruang bilik.

Iya mansutka pekara nya maya mantaika Bajet Sarawak 2027 nyerumba Aum Kunsil Nengeri (DUN) Sarawak, sehari tu.

Kelimpah FTES, perintah nengeri mega ngagihka RM30.5 juta ungkup program meri laptop pechuma ngagia nembiak taun keterubah renggat diploma enggau bachelor degree, sereta RM2 juta ungkup program baucher bup.

Sepenyampau RM50 juta agi disediaka ungkup bantu belanja khas ngagai anak  Sarawak ke nampung pelajar ba renggat diploma enggau bachelor degree ba palan pelajar tinggi ke diaku di selampur menua.

Perintah nengeri mega bisi ngungkupka RM10 juta dikena neruska subsidi bayar pulai jali Wang Turu Pelajar Tinggi Nasional (PTPTN) ngagai anak Sarawak ke udah mayar pulai lebih 30 peratus ari penyampau duit jali sida.

Nangkan ke nya, Inisiatif Graduet Pulai Sarawak (i-GPS) diteruska nengah agih RM8 juta dikena mantu kos tambang bilun nembiak pulai ari Semenanjung Malaysia, Sabah engau  Labuan ke Sarawak.

Nembiak ke layak sida ulih nerima subsidi manggai RM300 ungkup genap penerebai, lalu tatak minta subsidi nya maksimum dua kali dalam setaun.

Ngelansa pekara bekaul, RM18.5 juta diagih ungkup Sekularship Jali Perintah Nengeri Sarawak, Sekularship Tunku Abdul Rahman enggau Sekularship Lokal, ditangkan Yayasan Sarawak nyendiaka RM206 juta dikena melanja sekularship enggau jali sekularship 2027.